Queen Elizabeth II pasal Prince Philip a thi

Britain ram lalnu, Queen Elizabeth II pasal, Prince Philip chu kum 99 mi niin an ram huna nimin zingah khan a thi.

Buckingham Palace chuan Prince Philip thih thu hi hi a puang a, "His Royal Highness chu tukin zing khan Windsor Castle-ah thlamuang takin a kal ta," tiin thuchhuah an siamah an tarlang. Prince Philip hian kum 1974 khan Princess Elizabeth chu nupuiah a nei a, an inneih hnu kum ngaah a nupui hi Britain lalnu niin, tun thlengin lal ṭhuthleng hi a la luah a, Britain chanchina lal rei ber a ni.

Duke of Edinburg, Prince Philip hi a lung lam ṭhat loh avangin thla khat dawn damdawi-inah enkawl niin, March thla khan damdawi-in aṭangin a chhuak a ni. Mahse ṭhat lam a pan hlei thei lo a, nimin zingah khan Windsor Castle-ah a thi ta a ni.

Prince Philip hi kum 1921, June 10 khan Greek Island, Corfu-ah a piang a, a pa chu Prince Andrew of Greece and Denmark, King George I fapa naupang zawk a ni. A nu chu Lord Louis Mountbatten fanu, Princess Alice a ni. Queen nen hian fa pali, Prince Charles, Princess Anne, Prince Andrew leh Prince Edward-te an nei.