Pakistan PM hnenah Nobel Peace Prize pek phut

Pakistan National Assembly Secretariat-ah India leh Pakistan inkar boruak chhe tak siamhṭha tura a hmalakna avangin Pakistan Prime Minister Imran Khan hnenah khawvela chawimawina sang, Nobel Peace Prize pe tura an duhna motion putluh a ni.

Motion hi Pakistan Information Minister Fawad Chaudhary-a'n kar kalta Inrinni khan pu lutin, PM Khan-a hmalakna avangin nuclear ralthuam nei ram pahih, India leh Pakistan indo mai thei dinhmuna ding chu boruak ṭha a awm theih phah niin a sawi. He motion hi Pakistan-in an rama Indian Air Force pilot tla, Wing Commander Abinandan Varthaman India kuta a hlan hnuah putluh a ni.

Remna leh muanna a awm theihna tura Pakistan PM hmalakna avang hian kum 2020 Nobel Peace Prize pek a phu nia sawiin, Norwegian Nobel Committee hnenah he chawimawina hi hlan tura phutna online petition pawh kalpui mek a ni bawk.

Pakistan Foreign Minister Shah Mahmood Qureshi chuan India leh Pakistan inkar buaina awm chu tharum leh inbeihna hmanga chinfel theih a ni lo tih sawiin, inbiakna hmanga chinfel dan kawng zawn a ngai niin a sawi. Lahore-a press conference a neihah, Qureshi chuan Pakistan ram chu democracy ram a nih avangin buaina chinfel nan sipai chakna hmang loa palai inbiak tawnna neih hmasak chu a dah pawimawh zel a ni, a ti. Remna leh muanna chu an ngaih pawimawh ber a ni a, India nena indo chu an duh lo tih a sawi. Ram pahnihte inkar boruak ṭha siam turin Pakistan chuan theihtawp a chhuah zel tih a sawi bawk.