Huawei hotuin Canada thuneitute khing

China telecom company lian, Huawei-a chief financial officer Meng Wanzhou-i chuan nikuma US ngenna avanga Vancouver airport-a man a nih chunghangah Canada thuneitute a khing let.

Meng Wanzhou-i hi US-in Iran a hrekna an company puh a nih chungchangah nikum December thla khan man a ni a, bail-a chhuah mek a ni. US chuan an rama thawn turin Canada hnenah hian a ngen mek a ni.

Meng-i hi a civil rights palzut sakah puhin Canada sorkar, border agency leh police te a khing let a, China pawhin Mneng-i man a nih hi na takin a lo sawisel tawh a, politics kaihhnawih thil niin a puh a ni. Meng-i chu US in Iran hrekna palzuta a puhna hi a pha bawk a ni.

British Columbia Supreme Court-ah thubuai a thehluhah, Meng-i chuan Canadian Border Services Agency (CBSA) te chuan airport-ah Royal Canadian Mounted Police (RCMP) ten thu dik hrilh loin an man hmain hrengin an dap niin a sawi. Man a nih dan chu dan kalh a ni tiin, officer-te chuan an hren chhan an hrilh duh lo tih a sawi bawk.

Meng-i hi Huawei dintu fanu a ni a, man a nih vang hian China leh US leh Canada inkar boruak pawh a ṭhat loh phah a ni.

Khawvela smartsphone siamtu company lian ber dawttu, Huawei lakah hian US chuan thubuai eng emaw zat a ziaklut a ni.