Venezuela-ah Juan Guaido a kir dawn Nawrh huaihawt leh a tum

Venezuela acting president-a inpuang, National Assembly hotu Juan Guaido chu Latin America ramte a tlawhkual hnuah Venezuela ramah a kir leh dawn a, Venezuela President Nicolas Maduro ban phutin nawrh huaihawt chhunzawm leh nghal a tum.

Guaido-a hi ram 50 chuang chuan Venezuela ram hruaituah an pawm a, an zingah US leh a thawhpui ramte an tel. Mahse Nicolas Maduro chuan amah chu dan ang taka Venezuela mipuiten an ram hruaitu atana an thlan a ni tih sawiin, acting president atana Guaido a pawm vang hian US nena an inlaichinna pawh a tichat tawh a ni. Maduro hi China, Russia leh Cuba ramten an thlawp ve thung a ni.

Venezuela Supreme Court chuan interim president-a a inpuan hnuah Juan Guaido hi a zin kual khapna thupek a tichhuak nghal a, hei vang hian engtinnge Venezuela ramah hian a kir leh dawn sawichian a ni lo a, an ram a luh hnuah Maduro hian a chungah eng ang action nge a lak dawn hriat a ni lo bawk.

US National Security Adviser John Bolton chuan Juan Guaido him tak a kir theihna tura tiderthawng leh tinatu an awm a nih chuan na taka an chhan let tur thu a sawi. EU foreign policy chief Federica Mogherini pawhin Guaido hi tihnat a nih chuan boruak chhe tak a chhuak dawn a, khawvelin Venezuela ram a dem dawn a ni, a ti.

Guaido hian thla hmasa khan ramri kanin Colombia ramah a lut a, hemi hnu hian Latin America ram eng emaw zat a tlawh kual nghal a ni. Colombia-ah hian US Vice President Mike Pence leh Brazil President thar Jair Bolsonaro te pawh hmuin, an ram dinhmunte a sawipui.

Venezuela tualchhung buaina avang hian an ram mi tam tak chu an tlanchhe tawh a, Guaido hian Pathianni khan Guaido chuan tlanchhe zinga ṭhenkhat chu Ecuador-ah a hmu a ni.