Iran-in Donald Trump lu manah dollar mtd 80 phal

America sipaiten Iran mi pawimawh, Major General Qasem Soleimani an thahsak hnuah ram pahnih inkar chuan chhiat lam a pan zel a, Iran chuan US president Donald Trump lu manah US dollar maktaduai 80 a phal niin media report chuan a tarlang. 

TV-a General Soleimani vuina inkhawm tihchhuah a nih laiin, official state broadcaster-te chuan US President that thei hnenah Iran mi pakhat zel tan dollar khat zel anga chhutin lu man hi pek a ni dawn tih an sawi. "Iran-ah hian mi maktaduai 80 an cheng a, Iran mipui awm zat aṭang hian President Trump that thei hnena pek tur dollar maktaduai 80 kan chhawp­chhuak dawn a ni, " a ti. President Trump-a thupek angin January 3 khan Islamic Revolution Guard Corps-a Quds Force commander, Soleimani hi America sipaite'n an that a, a rual hian Hashd Shaabi force deputy chief, Abul Mahdi al-Muhandis pawh thah tel a ni bawk. 

Iran Revolutionary Guard hotu, Hossein Salami chuan US thiltih avang hian an rama US hmun hrang hrangte  halsakah a vau. He thu hi Soleimani khua, Kerman-a central square-a mipui pungkhawm hmaah a sawi a ni. 

Salami chuan Soleimani hnathawhte fakin martar a ni tih a sawi a, Iran hmelmate tana mi hlauhawm tak a ni, a ti. "A thihna phuba hi kan la ngei dawn. An hmun duh laite chu kan halsak ang," tia sawiin, Israel a demna thu a sawi tel nghal bawk. 

Iran leh US inkar boruak chhe mek zel avangin US chuan New York-a United Nations Security Council meeting-a tel tum, Iran foreign minister Mohammad Javad Zariff chu visa a pe duh lo. Meeting hi naktukah neih a ni ang. 

Iran minister visa pek duh loh chungchangah US State Department lam chuan engmah an sawi zawm duh lo. UNSC meeting-ah hian Zariff hi a tel a nih chuan Soleimani thah a nih chungchang US demna sawina hun remchang a nei thei dawn a, hei vang hian hun remchang an pe duh lo nia ngaitu tam tak an awm. Zariff hi nikum April leh July thla khan UN meeting-ah a lo tel tawh a ni. 

Israel prime minister Ben­jamin Netanyahu chuan US-in airstrike hmanga Iran commander Qasem Soleimani a thahnaah Israel chuan inhnam­hnawihna a neih loh thu a sawi. Israel security cabinet special meeting neihnaah Neta­nya­hu chuan hei hi sawi­chhuakin, Iran leh US inkar boruak chhe mekah hian Israel chuan telna a nei ve lo a ni, a ti. Iran leh Israel hi ram inhal tak an ni reng a, Solei­mani thihnaah hian Israel hian inrawlhna a neih hriat ni lo mah se, Iran mipuite chuan US an demna thu an sawi rualin Israel pawh an sawi tel ve zel a ni.