Myanmar sipaiten mi 80 chuang an kaphlum leh

Myanmar sipaite chuan Bago khuaa sipai rorelna duh lohna lantira nawrh huaihawt zinga 80 chuang an kaphlum leh niin activist-te chuan an sawi.

Bago khua hi Yangon khawpui hmarchhak lam, km 90 vela hlaa awm a ni. Sipaite hian Zirtawpni zan leh Inrinni chawhma lam khan nawrh huaihawta pungkhawmte hi beiin mi 80 chuang an kaphlum nia sawi a ni. Sipaite hian an mi kahhlumte ruang hi lakhawmin, Zeyar Muni pagoda compound-ah an dah khawm a, helai hmun hi tlawhpawh theih lohin an khar zui bawk. Hei vang hian thi zat chiah hi hriatchian theih a ni lo.

Nawrh huaihawtte chuan sipaite chet dan chu insuatna rapthlak tak thleng ang mai a ni tih sawiin, an mi hmuh apiang an pawng kah tih an sawi. He khuaa cheng mi tam tak chu himna zawngin khaw dangah an tlanchhe bawk.

Monitoring group Assistance Association for Political Prisoners (AAPP) chuan sipai rorelna duh lohna lantira February 1 aṭanga ram chhung hmun hrang hranga nawrh huaihawt a nih hnuah, sipai kut tuara thi hi mi 600 chuang an tling tawh tih a tarlang.

Hetih lai hian kar liam ta Zir­tawpnia sipai sorkar thupuangtu, major general Zaw Min Tun-a'n press conference a neihah, tualchhung buaina chhuaka thi hi civil mi 248 leh police 16 an nih thu a sawi a, sipaite chuan nawrh huaihawtte lakah ralthuam an che lek lo tih a sawi bawk.

Helpawlin police 10 that
Inrinni liam ta khan Myanmar khawchhak lam, Shan state-a Nagu­mon police station chu hel­pawl intelkhawmten beiin, police 10 an that nia sawi a ni.

Police station beitu helpawl intelkhawmah hian Arakan Army, Ta’ang National Liberation Army leh Myanmar National Democratic Alliance Army-te an tel. Helpawl pathum intelkhawm, Brotherhood Alliance hian sipai rorelna duh loa nawrh huaihawt mekte chungah sipaite rawng taka an che a nih chuan, mipuite hi zawmin sipaite an beih let tur thu an lo sawi tawh a ni.

Shan News chuan helho hian police 10 an kaphlum niin a sawi a, Shwe Phee Myay news chuan police 14 an thi niin a tarlang thung.

No-fly zone-ah puang turin ngen
United Nations-a Myanmar ambassador Kyaw Moe Tun chuan an rama civil sorkar paihthlatu, sipai sorkar chu hrek tur leh no-fly zone a puang turin a ngen.

Kyaw Moe Tun hi sipaiten sorkar thuneihna an hnehchhuh duh lotu leh na taka sawiseltu a ni a, sipai sorkar pawhin UN-a an ram aiawhtu a ni tawh lo tih pawh an lo sawi tawh bawk.

United Nations Security Coun­cil hnenah Myanmar ram chhung buaina avanga mi tam takin nunna an chan hnuah, sipaite chunga action na taka lakna a la awm lo a ni tiin Myanmar palai chuan a sawi a, hei vang hian ram dangte inthuruala na taka action an lak thuai a ṭul tawh a ni, a ti.