April 17-ah Prince Philip vui liam dawn

Queen Elizabeth II pasal Prince Philip chu April 17 hian vui a ni dawn tih Buckingham Palace chuan a sawi. Prince Philip hi kar liam ta Zirtawpni khan kum 99 mi niin a thi a ni.

Buckingham Palace thupuangtu chuan Duke of Edinburgh, Prince Philip vuina hun hi state funeral ang ni loin, 'ceremonial royal funeral' a ni dawn tih sawiin, hei hi ama duhdan a ni, a ti.

Windsor-a St. George Chapel-ah vuina inkhawm hi neih a ni dawn a, he hunah hian Covid-19 hripui leng avangin mipui an tel a rem dawn lo a, mahse television lamah tihchhuah a ni thung ang.

Britain prime minister Borin Johnson chuan Prince Philip hi ram pumah ni riat sun anih tur thu a lo puang tawh a, a sunna hun hi a vui ni hian a tawp ang. Mahse lal chhungkaw bik chuan kar hnih chhung sunna hi an hmang dawn a ni.

Royal family website chuan lal chhungkaw chenna in bulah pangpar leh thil dang, Prince Philip thlahna atana dah lo turin mipuite a ngen a, pangpar an dah ai chu charity lamah midangte ṭanpuina tana hlan zawk turin a ngen.