China-in a defence budget 7.5% in tipung Kum khat atan US dollar tld 177.61 dah
China chuan 2019 defence budget chu kum hmasa aiin 7.5%-a a tihpun thu Thawhlehni khan sawiin, defence budget atan hian US dollar tluklehdingawn 177.61 a dah. Hei hi an ram pawisain yuan trillion 1.19 a ni.
Nimina China Parliament, National People's Congress (NPC) annual session hawnna inkhawmah draft budget report hi thehluh a ni. Kumina defence budget a tihsanna hi nikuma a tihsanna aiin a la hniam zawk a, nikum khan defence budget hi a kum hmasa aiin 8.1% in a tipung a ni. Hetichung hian China hi US dawta defence lama sum seng hnem ber ram a ni.
China hian kum 2015 thleng khan a defence budget hi double digit in a tipung ṭhin a, mahse kum 2016 aṭang khan a punna hi single digit-ah a tihniam tawh a ni. Kum 2016 khan 7.6%-ah tipungin, 2017-ah 7% in a tipung bawk.
Tun hnaiah hian China hian a sipaite thuam ṭhatna turin hma a la a, navy leh air force-te an huang a zauhsak laiin khawmual sipai, Peoples Liberation Army (PLA) sipai erawh nuai thumin a titlem thung. Hetichung hian PLA hi khawvela sipai ngah ber a la ni zui tho a, sipai maktaduai hnih vel a la nei a ni.
China President Xi Jinping chuan PLA chu world class military a siam a tiam a, hemi rual hian a ṭul huna indo inpeih turin sipaite hi a chah fo bawk.
NCP thupuangtu Zhang Yesui chuan defence budget an tihpun ṭhinna chu awmze nei leh ṭangkai tak a ni tih sawiin, tun ṭuma an tihpunna pawh chu sipai thuam ṭhatna tur leh an ram himna tura an mamawh a nih thu a sawi. Hemi rual hian ram dangte nena tehkhin chuan China-in defence budget-a a dah chu GDP aṭanga 1.3% chauh a ni tih sawiin, developing country dangte chuan an GDP aṭanga 2% vel defence atan hian an hmang ṭhin a ni, a ti.
Defence policy thar an kalpuina hnuaiah China hian aircraft carrier thar pakhat neiin, pakhat chu enchhin mek a ni a, siam lai pakhat a nei bawk. State media chuan China hian aircraft carrier thar panga neih thuai a tum tih tarlangin, US in a neih ang nuclear carrier pawh siam a tum a, hei bakah hian naval ship leh submarine-te pawh a nei thar bawk tih a tarlang.