Mexico ramah mi 61,000 chuang bo

Kum 2006 aṭanga Mexico sorkarin ruihhlo tawlhrutute (drug cartel) laka an ram sipaite hmanga beihpui a thlak hnu, vawiin thlenga ruihhlo kaihhnawih avanga bo zat chu mi 61,000 chuang an nih thu Mexico sorkar chuan a tarlang.

Mexico sorkarin bo zat a tarlan hi, a tarlan hnuhnung ber aiin 50% zetin an pung a ni. National Registry of Missing or Missing Persons (RNPED) head Karla Quintana chuan sorkarin bo zat a chhinchhiah hi mi 61,637 an nih thu sawiin, chung zinga 26% chu hmeichhia an nih thu a sawi.

Nikum kha Mexico ramah hian ruihhlo kaihhnawih avanga inthahna thlen hnem ber ṭum a ni a, mi 31,000 an thi a ni. Kum 2018 December thla aṭanga Mexico president ni zui ta, Andrés Manuel López Obrador (AMLO) chuan an rama ruihhlo tih rem a nih theih nan "hugs not bullets" policy a hmanga, mahse hei hian awmzia a nei vak lem lo niin thuthar thehdarhtute chuan an sawi.

Mexico National Search Commission chuan ruang thuhrukna hmun 873-ah ruang 1,124 an hmuhchhuah thu a tarlang. Sorkar chuan heng thite hi tute nge an ni tih an hriatchhuah zung zung theih nan, 'DNA database' din a ni tih commission chuan a tarlang bawk. Mahse thi zinga a tam zawk hi tute nge an nih tih erawh hriat chian a la ni lo. Abik takin Mexico hmar lama awm Tamaulipas khuaah hian mithi ruang chhar hnem ber a ni a, Mexico chhimthlang lama awm Jalisco-ah hian bo report an tam ber niin Commission chuan a tarlang bawk.