NKorea-in missile site tuaithar leh

South Korea news agency, Yonhap chuan North Korea chuan nikuma US President Donald Trump leh NKorea hotu Kim Jong-un ten summit an neih ṭuma tihchhiat a lo tiam tawh, missile launch site chu a tuaithar leh niin a sawi.

Yonhap News Agency in a tarlan danin, North Korea hian Tongchang-ri launch site-ah hna thawk leh tawhin, inchung leh kawngkhar te a thlak thar niin a sawi. Satellite image aṭanga a lan danin laund pad hi February 16-March 2 inkar vel khan siam thar leh nia sawi a ni bawk.

Tongchang-ri site hi NKorea hian satellite kahchhuahna leh engine enchhina atana a hman ṭhin a ni a, ballistic missile kahchhuahna atan chuan ala hmang lo nia sawi a ni. Nikuma khan he site ṭhiah hna hi thawh a ni a, mahse US nena inremna zawnga an inbiakna tihtawp a nih hnuah a ṭhiah hna pawh hi an thawk chhunzawm ta lo a ni.

Center for Strategic and International Studies in report a tihchhuahah pawh NKorea hian missile site siamṭhat hna hi chak taka thawk mek a nih thu a tarlang.

US President Donald Trump leh NKorea hotu Kim Jong-un te chuan nikum June 12 khan Singapore-ah summit vawi khatna an lo nei tawh a, hemi ṭum hian Kim chuan an rama missile engine testing site pui ber chu tihchhiat a tiam. Trump chuan mssile testing site tihchhiat tura tih hi a hming tarlang lo mah se, US official chuan Tongchang-ri a Sohae Satellite Launching Ground niin a sawi. February 28-28 khan hruaitu pahnihte hian Vietnam khawpui, Hanoi-ah summit vawi hnihna an nei leh a, mahse inremna ziakloin summit hi an titawp a ni.

Thawhlehni khan US National Security Adviser John Bolton chuan NKorea chuan a nuclear programme a tihtawp loh chuan hrekna siambelh leh a la ni thei dawn niin a sawi. US chuan nuclear programme tihtawp chungchanga NKorea hmalak dante ngun takin a lo thlir dawn a, hei hi an tipuitling lo a nih chuan President Trump pawhin chiang taka a lo sawi tawh angin, economy lama hrekna hman mek bakah hrekna dang pawh an la siam mai thei tih a sawi.