SKorea court-in president hlui bail dilna phalsak

South Korea court chuan nimin khan an ram president hlui, eiruk thubuai vanga nikuma man Lee Myung-bak chu bail-a chhuah a phalsak.

Kum 2008-2013 chhunga SKorea president lo ni tawh, Lee hi nikum October thla khan eiruk leh sum tihchingpenna puhin thiam loh chantir a ni a, kum 15 tang turin hrem a ni.

Seoul High Court chuan kum 77 mi, Lee-an a hriselna ṭhat tawk loh chhuanlama bail-a chhuah a dilna chu nimin khan a phalsak ta a ni. Lee hian a kum upat tawh vang leh, diabetes leh mutṭhat theih loh hri a vei tel vangin January thla khan bail-a chhuah hi a dil a ni.

Lee hi President a nih laiin Samchhung Electronics aṭangin thamna sum tam tham tak dawngin, hemi manah hian an chairman, chhiah awlruk vanga man Lee Kun-hee chu ngaidamin a chhuahtir nia puh a ni. Mahse he puhna hi thu dik lo niin a sawi thung a, tih dik loh a neih loh thu leh an puhnate chu politics thila phuba lakna zawk niin a sawi.

South Korea president hlui la dam, mi palite chu thuneihna an chan laia dan loa thiltia puhin thiam loh chantir vek an ni. Park Geun-hye-i pawh president a nih laia a thuneihna dik lo taka hmang leh thamna sum laah puhin kum 25 tang tura hrem a ni tawh bawk.