Suu Kyi-in a lawyer-te hmuh phalsak turin ngen : Sipai sorkarin thubuai dang siamsak leh

Myanmar sipaiten an hren mek, Aung San Suu Kyi chuan nimin khan video conference hmangin court-ah a inlan leh a, court hnenah a lawyer-te chu hmaichhana a hmuh phalsak turin a ngen. Hetih lai hian sipai sorkar chuan Suu Kyi thubuai dang a siam sak leh a ni.

Civil sorkar paihthlak a nih hnuah sipaiten Suu Kyi hi manin an hreng zui a, thubuai pawh an siam sak belh zel a ni. Nimin khan court chuan a thubuaite hi ngaihtuahin, Suu Kyi hi video conference hmangin a inlan a, natural disaster management law-a section 25 hnuaiah thubuai hi siamsak leh a ni tih a lawyer Min Min Soe chuan a sawi.

Kum 75 mi, Suu Kyi hi phalna nei loa ram dang aṭanga walkie talkie radio laluta puhin thubuai siamsak a ni tawh a, coronavirus protocol bawhchhiaa puh a ni leh bawk a, thamnaa laah an puh bawk. Hei bakah hian colonial-era official secrets act bawhchhiaah puh a ni leh a, he thubuaiah hian thiam loh chantir a nih chuan kum 14 thleng lungin tan tir theih a ni ang.

February 1-a sipaiten an man aṭangin Suu Kyi hi video link hmang chauhin a lawyer-te a biak phalsak a ni a, an inbiak chhung hian security official-te an awm tel ve ziah ṭhin bawk.

Suu Kyi lawyer, Min Min Soe chuan an inbiaknaah pawh a thu­buai chungchang bak engmah an sawi theih loh thu leh, sipai rorelna duh lohna lantira an ram chhung buaina thleng mek chungchangte chu an sawipui ve theih loh thu a sawi. A thubuaite hi April 26-ah ngaihtuah leh tur a ni.

Sipai kut tuarin mi 706 thi tawh
Assistance Association for Political Prisoners (AAPP) activist group chuan Myanmar sipai rorelna duh lohna lantira nawrh huaihawt zinga 706 chu sipai kut tuarin an thi tawh tih a tarlang.

Myanram ram kumthar, Thingyan holiday chu Thawh­lehni aṭanga inṭanin Inrinni thleng a awh dawn a, hei hi Myanmar holiday pawi­mawh ber niin kumtin ṭawng­ṭaina nena hmangin kawtthler leh temple-te chu tui thianghlimin an theh ṭhin.

General Strike Collabo­ration Committee protest group hruaitu Ei Thinzar Maung chuan kumina Thingyan holiday chu lungrualna lantirna atana hmang tura ngenin, Buddhist-te chuan an sakhua thuam inbela ṭawngṭaina hla chhamrual tur te, Kristiante chu thawmhnaw var inbela Sam chhiar rual turtein a ngen. Sakhaw dangte pawh an hruaitute kaihhruaina zawm turin a ngen a ni.

Nimin khan Tamu khua leh Mandalay-ah sipaiten nawrh huaihawtte lakah silai an hmetpuak leh nia sawi a ni a, thi leh hliam zat erawh hriat chian theih a la ni lo.