Huawei-in an thilsiam hman khap vangin US sorkar khing
China telecom company lian, Hauwei chuan US sorkarin a hnuaia agency-te an company thil siam hman a khapsak avangin a khing.
Huawei chuan US hian an company thil siam hman a khap chungchangah a khapna chhan a sawifiah tawk lo niin a sawi a, an company leh China sorkarin inzawmna a nei nia a puhna pawh thu dik lo niin a sawi. US sorkar khinna hi Plano, Texas-a Eastern District Court-ah a thehluh a ni.
US hian an ram himna tiderthawng thei nia sawiin Huawei products-te hman a lo khap tawh a ni. "US Congress chuan Huawei product hman a khap chhan sawifiah leh finfiahna pe tura kan phutna a tihlawhtling lo a, hei vang hian dan hmanga hma kan lak a ngai ta a ni" tiin Huawei Rotating Chairman Guo Ping chuan a sawi.
Huawei thilsiam hman a khap chu dan kalh a nih bakah, he khapna hian company dangte nena boruak ṭha hnuaia an inelna tur boruak a tih chhiatsak a, US consumer-ten an tuar a ni, a ti. US sorkar chuan an server-te hack sakin, company email leh source code-te a ruksak niin a sawi.
US-in Huawei thilsiam hman a khap hnu hian ramdang ṭhenkhat pawhin an khap zui ve nghal a, an zingah hian Australia leh New Zealand pawh an tel. Security lam thil venthawn a ngaih vangin telecom company-te chu Huawei thil siam hmang lo turin an ti a ni.
US sorkar ngenna angin nikum December 1 khan Canada thuneitute chuan Huawei Chief Financial Officer Meng Wanzhou chu an lo man tawh bawk. US-in Iran hrekna a siam palzutah Huawei company hi puh a ni a, hei vang hian Wanzhou hi man tura ngenin, man anih hnu hian a chungthu ngaihtuah tura US-a thawn turin a ngen tawh bawk.