Pakistan-in India fighter jet kapthlatu pilot hming puang

Pakistan Foreign Minister Shah Mahmood Qureshi chuan February 27 khan Pakistan Air Force pilot-te chuan Indian Air Force (IAF) thlawhtheihna pahnih an kahthlak sak ngei tih sawiin, IAF thlawhtheihna kapthlatu Pakistan pilot pahnihte hming chu nimin khan National Assembly-ah a puang.

Minister Qureshi chuan Pakistan Air Force pilot-te chu fakin, pilot pahnih Squadron Leader Hassan Siddiqui leh Wing Commander Nauman Ali Khan-te chuan Indian jet an kapthla a, pakhat chu Pakistan-occupied-Kashmir ah tlain, pakhat chu Jammu and Kashmir-ah a tla niin a sawi.

Pakistan Peoples Party Chairman Bilawal Bhutto Zardari pawhin thu sawiin, February 27-a IAF Wing Commander Abhinandan Varthaman khalh, MiG 21 jet kapthlaktu Squadron Leader Siddiqui chu a fak a, hemi hnu hian Qureshi chuan India thlawhtheihna pahnih an kahthlak thu sawiin, pilot pakhat dang hming hi a rawn sawi nghal a ni. Qureshi chuan Bilawal-an Indian pilot man rang taka an chhuah leh nghal chungchanga Prime Minister Imran Khan lakah zawhna a siam chu chhangin, ngun taka an ngaihtuah hnuin Pakistan tana ṭha tura ti an nih thu a sawi. "Hemi hmang hian Pakistan chuan boruak ṭha lo awm mek siamṭhat a duhzia chiang takin a lantir a, hei hi khawvel pawhin an ngaihlu a ni", a ti.