Donald Trump-a campaign team chief hlui thla 47 tang turin hrem

US President Donald Trump-a campaign chief hlui, Paul Manafort chu US Judge-te chuan chhiah pek leh bank chungchang thila inbumna hmang leh foreign bank account a neihte puangzar loa puhnaah thla 47 tang turin a hrem.

Nikum August thla khan Manafort hi a thubuaiah hian thiam loh chantir a lo ni tawh a ni.

Kum 69 mi, Manafort-a hremna tur hi Ningani khan Alexandria, Virginia-a US District Court-ah ngaihtuah a ni a, Manafort hian zahngaihna lantir turin ngen mah se Judge TS Ellis chuan thla 47 tang turin a hrem a ni. Hei bakah hian Manafort hi dollar 50,000 chawi tura tih a ni bawk.

Prosecutor-te chuan Manafort hi Russia thlawp, Ukraine sorkar tana consultant hna a thawh laia a sum lakluhte US sorkar laka thupah an puh. Ukraine politician-te a thawhpuina aṭanga a sum hmuh US dollar maktaduai 55 chuang chu Cyprus-a a bank account-ah a dahbo nia sawi a ni. Ukraine President aṭanga Viktor Yanukovych paihtlak a nih hnu khan Manafort hian loan lak theihnan bank-te chu dawt a hrilh nia puh a ni bawk.

Special Counsel Robert Mueller chuan kum 2016 US President thlanna neihah Russia inrawlh chungchang a chhui mek a, Trump-a election campaign official paruk chu thubuai siamsak an ni tawh a ni. Manafort pawh hi chhui tel ni mah se tuna thiam loh chantir leh hrem a nihna hi election campaign kaihhnawih erawh a ni lo.

President Trump-a personal attorney hlui Michael Cohen chu chhiah awlru leh dan kalha campaign, Congress hmaa dawt sawia puhnaah thiam loh chantir niin kum thum tang turin hrem a lo ni tawh bawk.