Israel PM-in Hamas-te vau

Israel Prime Minister Benjamin Netanyahu chuan Israel leh Gaza Strip ramri-a Palestnian-ten buaina an siam chhunzawm zel a nih chuan Gaza-a rorellai, Palestinian pawl Hamas-te chu sipai hmanga na taka beih an ni ang, a ti.

Defence ministry chelh kawp bawk, PM Netanyahu chuan Ningani khan Israel chhim lama security chungchang a enfiahnaah Hamas-te vauna hi a sawichhuak a ni. "Hamas-te chuan an chet dan phu ang chhanna chu Israel aṭangin an hmu zel dawn tih an hrethiam tur a ni", a ti.

Hetihlai hian Israel army tank chuan Gaza Strip hmarlama Hamas post an kap a, thi leh hliam erawh an awm hriat a ni lo.

Sipai thupuangtu chuan Hamas post beih a nih chhan chu Ningani zinga Gaza Strip hmar lama Israel sipaite hmun kah a nih vang a ni tih a sawi. Israel sipaite hian ni nga chhung chu a zawnin Gaza military post, traning camp leh an hmun dangte chu indo thlawhtheihna, drone leh tank hmangin an bei tawh a ni. Sipaite hian Gaza

aṭang hian Israel chhim lamah puak thei thil dahna balloon chhuah a nih ṭhin avanga an chhan letna a nih thu an sawi.