Fukushima nuclear plant aṭanga tui paihchhuah remti

Japan sorkar chuan lirnghing na tak thleng­in a tihchhiat tak, Fukushi­ma nuclear plant aṭanga tuipuia tui, ton maktaduai khat chuang paihchhuah tumna chu a remti.

Nuclear plant aṭanga tui paih chhuah tur hi sawngbawl vek a ni dawn a, radiation level pawh drinking water ami aiin a hniam dawn tih an sawi. Mahse fishing industry lama thawktute chuan he ruahmanna hi an duh lo hle a, China leh South Korea pawhin an sawisel bawk.

Japan sorkar chuan nuclear plant aṭanga tui paih chhuahna tura ruahmanna siam hi pawm mah se, nuclear fuel-te tihdaihna tura tui hmante paih chhuah hna hi kum hnih hnu velah kalpui ṭan a ni dawn chauh thung.

Kum 2011-a Japan rama lirnghing na tak leh tsunami thleng vangin Fukushima power plant-a reactor building-te chu a chhia a, cooling system-te a tichhia a ni. Nuclear fuel tih daih­na atan hian tui hmante te chu sawngbawl mek niin, radio­active element awmte tihbo tuma beih mek a ni. Heng tui an sawngbawlte hi tank lian tak takah dah an ni a, mahse plant ope­rator Tokyo Electric Power Co (TepCO) chuan an hmunin a daih tawh lo tih sawiin, kum 2022-ah chuan heng tank-te hi an khat vek tawh dawn tih a sawi.

Tank hrang hrangah hian radioactive water hi ton makta­duai 1.3 vel dah an ni mek a, heng tui dahkhawl hi Olympic-sized swimming pool 500 chhun khahna daih an tling.

Environmentalist group hrang hrangte chuan nuclear plant-a tui dah khawlte tuipuia paih chhuah tum hi nasa takin an dodal. Greenpeace chuan sorkarin tui paihchhuah a remtih hian Fukushima mipuite hmakhua a ngaih lohzia a tilang leh a ni, a ti.

Mahse Japan sorkar chuan an tui paihchhuah tur hi hun rei tak sawngbawl a, radioactive element awmte paihbo kim a nih deuhthaw tawh thu sawiin a him tawk tih a sawi thung. Hei hi International Atomic Energy Agency pawhin thlawpin, Fukusima plant aṭanga tui paih chhuah tur chu plant danga tui chhia paihchhuah tur nen an inang reng tih a sawi.