Myanmar activist-ten New Year lawmna ṭhulh, Silent Protest huaihawt

Myanmar sipai rorelna dodalna lantir mektute chuan an ram kum thar lawmna chu ṭhulhin, ram chhung hmun hrang hrangah silent protest an huaihawt.

Myanmar kum thar, Thingyan hi ni nga chhung lawm a ni ṭhin a, nimin Thawhlehni aṭanga Inrinni thleng New Year holiday hian a awh a ni. He hun hi ṭawngṭaina nen an lawm ṭhin a, temple-a Buddha limte chu tifaiin, kawtthlerte chu tui thianghlimin an theh ṭhin bawk.

Mahse kuminah erawh Thingyan hi lawm loin, sipai rorelna duh lohna lantirna atan an hmang thung. Nikum khan coronvirus leng vangin kum thar lawmna an hmang tawh lo bawk a ni.

Assistance Association for Political Prisoners (AAPP) activist group chuan February 1-a sipaiten civil sorkar thuneihna an hnehchhuh duh lohna lantira nawrh huaihawt zinga mi 710 chu sipaite kut tuarin an thi tawh tih a sawi.