Iran-in nuclear ralthuam a neih kan remti ngai lo ang - Israel PM

Israel prime minister Benja­min Netanyahu chuan Iran-in nuclear ralthuam a neih chu Israel-in a remti ngai dawn lo tih a sawi.

Thawhṭanni khan PM Netan­yahu leh an ram tlawhtu, US secretary of defence Llyod Austin-te chuan Jerusalem-ah joint press conference an nei a, he hunah hian Netanyahu chuan Israel PM a nih chhunga a policy-ah, Iran-in nuclear ralthuam a neih a remtih ngai loh tur thu a hi a sawi a, US Defence Secretary pawhin hei hi a pawmpui niin a sawi bawk.

Lloyd Austin hian Iran chungchang chu sawilang ve lo mah se, US leh Israel chuan inlaichinna leh thawhdunna ṭha tak an neih zel tur thu a sawi. An thawhdunna hmangin Middle East-ah remna leh muanna tluantling a awm chhoh theih a beisei thu a sawi bawk.

Austin hi ni hnih cham turin Pathianni khan Israel-ah hian a zin a, hei hi US president Joe Biden kaihhruai sorkara senior official-in Israel a tlawhna hmasa ber a ni.