Myanmar activist-ten 'bloody protest' nei

Myanmar activist-te chuan nimin khan sipai rorelna duh lohna lantirin 'bloody protest' an nei leh a, nawrh huaihawt zinga sipai kut tuara thite pualin kawtthlerah rawng sen thehin, sorkar office hrang hrangah sipai sorkar duh lohna thu rawng senin an ziak bawk.

Khawpui hrang hrangah 'bloody protest' hi mipuiten an zawm a, khaw ṭhenkhatah chuan kawngte zawhin, sipaiten an hren mek an ram hruaitu Aung San Suu Kyi chhuah tura phutna thuziakte an keng a ni. Nimina nawrh huaihawtna hrang hrangah hian sipaite nena innawr buaina a thlen thawm hriat a ni lo a, hemi rual hian sipaiten broadband internet leh mobile data service an hrek avangin information kimchang erawh hriat a harsa hle thung.

Thawhlehni aṭanga Inrinni thleng hi Myanmar New Year holiday, Thingyan a ni a, hemi chhung hian activist-te chuan sipai rorelna duh lohna lantirin kawng hrang hrangah nawrh huaihawt an tum.

UN-in Syria ram dinhmun ang a thlen hlauthawng
United Nations High Commi­ssioner for Human Rights Michelle Bachelet chuan Myanmar chuan Syria ram tualchhung buaina dinhmun ang a tawh chhoh mai a hlauhthawnawm tih a sawi.

Thla hnih chhung chu sipai rorelna duh loin mipuiten nawrh an huaihawt tawh a, nawrh huaihawt zinga 710 chu sipaite kut tuarin an thi tawh a, an zingah hian naupang 50 chuang an tel. Hetih lai hian mipuite hian nitin nawrh an la huaihawt chhunzawm reng tho a ni.

Bachelet-i chuan, "Syria tualchhung buaina nasa tak thleng ang kha Myanmar hian a tawn chhoh ka hlau a ni," tiin a sawi. Kum 2011-a Syria ramchhunga buaina thlen vang khan tualchhung indona a thleng phah a, kum 10 liam ta chhung khan ram chhung buaina thleng vangin mi 4,00,000 dawn an thih bakah mi maktaduai ruk chuang chu himna zawngin ram dangah an tlanchhiat phah bawk.

Sipai sorkar duh loa nawrh huai­hawtte chu tun hnaiah helpawl ṭhen­khatin an thlawp thu sawiin, sipai leh police-te pawh an bei zui a ni. Hei hian buaina nasa zawk chawh chhuak a, civil war a thlen phah hlauhthawnna pawh a lian hle.