Khawvela climate change bill nei hmasa ber ram New Zealand

New Zealand climate change minister James Shaw chuan Thawhlehni khan an ramah climate change bill siam a nih thu a sawi a, hei vang hian khawvela climate change law hmang thei hmasa ber ram an ni thei dawn a ni.

James Shaw chuan an rama bank, insurance company leh investment firm-te chu sik leh sa inthlak (climate change) vanga an sumdawnnaa harsatna leh danglamna an tawhte chu report tura tih an nih thu a sawi.

New Zealand prime minister Jacinda Ardern chuan kum 2050-ah an rama carbon emmission chu net-zero-ah dah tum a nih thu a sawi a, hei bakah hian an ram chuan renewable sources aṭangin energy chu kum 2035-ah chuan tam tham tak siam a tum thu a sawi bawk.

Dan thar an hman tur chungchangah hian James chuan, "Kum 2050-ah chuan kan rama carbon emmission awmte chu net-zero-ah dah tum mah ila, heng financial sector-te harsatna kan hriat hma loh chuan a theih loh a ni," a ti.

Climate change bill hi Parliament-ah sawi ho phawt a ni ang a, pass a nih chuan kum 2023 aṭangin company-te chuan climate change chungchanga report an tichhuak ṭan dawn a ni.