Johnson & Johnson (J&J) vaccine hman titawp lailawk

US, South Africa leh European Union chuan Johnson & Johnson (J&J) siam Covid-19 vaccine chu an tihtawp lailawk thu an puang.

Vaccine hman an tihtawp lailawk chhan hi thisen a tihkhang theih vang nia sawi a ni.

Hemi chungchangah hian Centers for Disease Control and Prevention leh Food and Drug Administration chuan Thawhlehni khan thuchhuah inṭawm siamin, hmeichhe parukah J&J vaccine an lak vangin an thisenah khang a awm tih hmuhchhuah a nih thu an tarlang.

US-ah hian J&J vaccine hi February 27 aṭang khan hman ṭan a ni a, mahse he vaccine ai hian Pfizer-BioNTech leh Moderna vaccine siamte chu hman tam a ni zawk thung. J&J vaccine la tawh hi US-ah hian mi maktaduai 7 vel an ni tawh a, US-a vaccine la tawh zawng zawng aṭanga 3% an tling.