South America Covid-19 : Argentina-ah Covid-19 hri kai tam ber ni a thleng

Argentina ministry of health chuan nimin khan darkar 24 liam ta chhungin an ramah Covid-19 hri kai thar mi 27,000 an awm thu a tarlang a, hei hi an rama Covid-19 hri a len hnua ni khat chhunga hri kai thar tam ber ni a ni.

Heng hri kai tharte nen hian Argentina-a Covid-19 hri kai tawh zawng zawng hi mi 25,79,000 an tling tawh a ni. Darkar 24 chhung vek hian hri vanga thi hi mi 217 an awm bawk a, anni nen hian hripui vanga thi tawh zawng zawng hi mi 58,174 an tling tawh bawk.

Nikum March 3 khan Argentina-ah hian Covid-19 hri kai hmasa ber chu hriat chhuah a ni a, hri kai hi kum 43 mi niin, Italy aṭanga haw a ni. Kar liam ta Zirtawpni khan Covid-19 hri leng vangin Argentina-ah hian bar leh restaurant-te chu zan dar 11 aṭanga zing dar 6 thleng hawn khap a ni a, public transport pawh mamawh zual tan lo chuan hmang lo hram turin sorkar chuan mipuite a chah.

Argentina health minister Carla Vizzotti chuan south America-ah Covid-19 hri lengin hluar lam a pan mek thu a sawi a, hei vang hian mipuite chu fimkhur hle turin a chah.

Kumin February thla khan Vizzotti chuan China siam Covid-19 vaccine Sinopharm chu emergency atan sorkar chuan hman a phal thu a sawi a, March 25 aṭang khan Sinopharm vaccine hi kum 60 chin chunglam pek a ni.

Brazil-ah Covid-19 vangin mi 3,808 an thi
Khawvela Covid-19 hri kai tamna ram pathumna ni mek Brazil-ah chuan Thawhlehni khan Covid-19 hri vangin mi 3,808 an thi a, anni nen hian hri vanga thi tawh zawng zawng hi mi 3,58,425 an awm tawh.

Kumin February thla aṭang khan Brazilah hian Covid-19 hri chi dang P1 an tih chu a leng ṭan niin mithiamte chuan an sawi a, hei vang hian hri kai hi an pun phah nasa hle bawk. Brazil ministry of health chuan Thawhlehni vek khan hri kai thar mi 82,186 an awm thu a tarlang.

Chile-ah ni 5 chhung mi 100 chuang thi ziah

Covid-19 hri vangin Thawhṭanni khan Chile-ah mi 137 an thi a, hei hi ni nga chhung a zawna Covid-19 vanga thi mi 100 chuang an awmna a ni.

Chile-a Covid-19 vanga thi tawh zawng zawng hi nimin thleng kha chuan mi 24,518 an tling tawh a, Thawhlehni khan hri kai thar mi 5,718 awm bawkin, anni nen hian hri kai hmuh chhuah tawh hi mi 10,88,710 an awm tawh bawk.