NKorea-in Assembly inthlan nei

North Korea mipuite chuan nimin khan National Legislature member 700 tur thlangin vote an thlak.

NKorea-a thuneitu sang ber, Supreme People's Assembly inthlan hi kum nga dana neih ṭhin a ni a, mahse he inthlanah hian seat pakhatah rorellai Korean Worker's Party-in a thlan, candidate pakhat zel chauh an awm avangin mipuite hian an duhzawng an vote ni loin, candidate atana ruat an pawmna an lantirna anga ngaih a ni zawk a ni.

Candidate hi Korean Worker's Party thlan vek an ni a, an thawhpui party tenau ṭhenkhatte chu assembly seat hi pe ve ṭhin mah se, thuneihna erawh an nei pha lo hle.

Mipuite hian candidate duh thlan tur nei lo mah se, vote thlak chu mipuite tihtur leh an mawhphurhna nia sawi a nih avangin vote pawh a tla ṭha thei hle a, 99% te a tla pha ṭhin a ni.

Nimina inthlan buatsaihah hian voter-te chuan an ballot-a candidate hming pakhat chauh awm chu an thlawp chuan tidanglam loin ballot box-ah an thlak a, an pawm loh erawh chuan a hming chu an thaichhia a ni.

Inthlan hma hian candidate-te thlalak leh nihnate chu puanzar an ni vek a,candidate duh lo zawnga vote thlak an awm ngai lo niin Election Committee chairman Jin Ki Chol chuan a sawi.