Myanmar-ah helhoin police pakua that

Myanmar khawthlang lama Rakhine state-ah kar kalta Inrinni zan khan helhoin police pakua an that a, hei vang hian state chhung boruak pawh a ṭha lo hle.

He inbeihna hi Rakhine state khawpui, Sittwe hmarlama Yoetayoke khuaa thleng a ni. Police pakua thah an nih bakah pakhatin hliam a tuar a, chin hriat lohin pakhat a awm bawk niin senior police officer chuan a sawi.

Khaw hotu San Aung Thein chuan police-te hi Arakan Army helte thah an nih thu a sawi a, Inrinni zan dar 11 hnu lamah khan police station an bei niin an sawi. Hel leh police-te hi minute 20 chhung vel an inkap zui a ni. AA helte hian January thla khan police 13 an lo kaphlum tawh a, security force-te nen an inkap reng bawk a ni.

Rakhine bial tana thuneihna sang zawk pek phut helte leh Myanmar security force-te inbeihna vang hian mi 5,000 chuang chu an tlanchhe tawh a ni.