Joe Biden-a'n Afghanistan-a US sipaite lakchhuah hun tur puang

US president Joe Biden chuan Afghanistan-a US sipai awmte chu kumin September 11-ah lak chhuah vek an ni dawn tih a puang.

White House aṭanga Nilainia an ram mipuite hnena thuchah a sawiah President Biden chuan, " US sipaite bakah NATO (North Atlantic Treaty Organization) Allies sipai dangte pawh Sep­tember 11, 2001-a firfiakten kan ram an beihna champha vawi 20-na a thlen hmain Afghanistan aṭangin lak chhuah an ni vek dawn a ni," a ti. Thu a sawi zawhah President hi Arglington National Cemetery-a kalin, kum 2001-a World Trade Centre beih a nih hnuah al-Qaida firfiakte nena indonaa America sipai thite zahna a hlan a ni.

President Biden chuan Ame­rica sipaite chu an haw a hun ta a ni, tiin, May 1 aṭangin hruai haw ṭan an ni dawn tih a sawi. Hemi rual hian hmanhmawh taka in lakchhuah nghal vek an tum lo tih sawiin, awmze nei takin lak chhuah a ni dawn tih a sawi. "Sipaite kan inlak chhuah ṭhen hnua Taliban-ten min bei a nih chuan, keimahni leh kan thawhpuite venhimna turin kan hmanraw neih zawng zawng nen kan ṭang leh nghal ang," tiin a vau lawk.

US leh Taliban hian hun eng emaw chen inbiakna an neih hnuah, nikum February 29 khan Afghanistan rama remna leh muanna a awm theihna atan leh, America sipaite lakchhuah an nihna turin inremna an lo ziak tawh a ni.