Brazil Senate-in President Bolsonaro chhui dawn

Brazil Senate chuan an ram president Jair Bolsonaro-a'n an rama Covid-19 hri leng dona kawnga a hma lak dan an chhui chiang dawn.

Brazil hi khawvela Covid-19 hri leng tuar nasa ber ram niin, US leh India dawta hri kai tamna ber ram a ni a, hripui vanga thi tamna ber ram dawttu a ni bawk. Hetih lai hian hri leng dona kawnga President Bolsonaro hmalak dan hian sawisel a hlawh hle a, medical expert-te bakah an ram mipuite chuan an sawisel nasa hle a ni.

President Bolsonaro hian Covid-19 hri leng hi 'flu satliah' tiin a sawi ṭhin a, hri darh tur venna kawnga khuahkhirhna siam leh lockdown puante a thlawp lo a, state sorkarin khuahkhirhna an siamte chu a lo sawisel sak fo a ni. Hei bakah hian mask vuah pawh a ngai pawimawh tawk lo a, pawn chhuahna leh mipui zinga a awmin mask vuah loa a awm hmuh tur a awm fo bawk.

Supreme Court chuan Senate-in President Bolsonaro kaihhruai sorkarin hri leng a do dan chhui hi a phalsak a ni. Health minister hlui Humberto Costa chuan Senate hian President-in social distancing dan a bawhchhiat nia puhna te, lockdown puan tumtu tualchhung thuneitute a beih leh dan te, vaccine an neih theih dan tur ngaihthah leh hri kai damdawi atana chloroquine a fak dan chungchangte chu an chhui chiang dawn tih a sawi.

A chhui chiang tur committee-ah hian senator 11 leh an thawhpui dang pasarih an awm dawn a, thuhretu hrang hrang an ko dawn a ni.