Myanmar sipaiten medical worker-te silaiin an kap

Myanmar sipaite chuan Ningani khan Mandalay khawpuia sipai sorkar laka lungawilohna lantirtu, damdawi lama thawk, medical worker ṭhahnem tak an kap hliam tih thutharthehdarhtu te chuan an sawi.

February 1-a sipaiin Nobel Prize pawh lo la tawh, Aung San Suu Kyi kaihhruai civil sorkar thuneihna a hnehchhuh duh lohna lantirin mipuite chuan kawng hrang hrangin lungawi lohna hi an lantir a ni. Kumthar lawmna ni nga chhung an hman thin, 'Thingyan' chu Thawhlehni aṭanga hman ṭan tur ni mah se sipai te chetdan duh lohna lantirna chi khat atan an ṭhulh tawh bawk a ni.

Damdawi-in lama thawk, mi ṭhahnem tak chuan Mandalay-ah hian lungawi lohna lantirin kawng an zawh a, sipaite chuan kawng zawhte hi hnawtdarhin silai an hmetpuak a, mi eng emaw zat an kah hliam bakah an zinga ṭhenkhat chu an man bawk niin Mazzima news agency chuan a tarlang. BBC Burmese service pawhin sipaiten medical worker nawrh huaihawtte an beih let thu hi a report bawk.

Activist group, Assistance Association for Political Prisoners chuan Suu Kyi-i kaihhruai sorkar paihthlak a nih hnua sipai rorelna duh lohna lantirtute zinga mi 715 chu security force-ten an kaphlum tawh niin a sawi.

Hetih lai hian sipaite chuan lungawi lohna lantir tute chuan kiam lam an pan zel niin a sawi thung.