Kar hnih chhung hi hun harsa tur : Donald Trump

United States (US) president Donald Trump chuan kar liam ta Inrinnia thu a sawinaah, an hma hun kar hnih chhung chu hri leng vanga an ramin hun a tawn khirh leh harsa ber hun tur a ni tiin, thihna pawh a thleng nasa dawn niin a sawi. 

Hemi rual hian thihna thleng tam lutuk tur chu awmze nei taka hma an lak chuan an ti hniam thei dawn tih a sawi bawk. US hi hri kai tamna ber ram a ni tawh a, mi nuai thum chuangin hri hi an kai tawh a ni. 

Company-te hnenah medical equiptment siam tura sorkarin thupek a siam chungchang pawh Trump chuan sawiin, thupek zawm lote lakah Defence Production Act (DPA) hman a ni dawn tih a sawi. "Mipuite tana kan ngenna te zawm lo a, sorkarin a mamawhte an supply duh loh a nih chuan, an laka khauh takin ro kan rel ang, kan khauh hle dawn a ni," a ti. 

US president Donald Trump chuan Malaria veite enkawl nana damdawi hman ṭhin, hydroxychloroquine mum (tablet) chu Covid-19 veite enkawlna atana hman theih a nih avangin India prime minister Narendra Modi hnenah supply turin a ngen tih a sawi. 

Kar kal ta Inrinnia White House-a Coronavirus task force-te briefing a neih puinaah, Trump chuan PM Modi chu phone call-a a biak thu sawiin, an rama Covid-19 hri kaite enkawl nana hydroxychloroquine mum India aṭanga chah a nih thu a sawi. Trump chuan, "India hian he damdawi hi a siam hnem a, an ram mipui tam tak tan pawh an mamawh tam hle dawn a ni. Malaria damdawi hi  Strategic National Stockpile kaltlangin damlo te enkawlna turin a pe chhuak dawn a ni," a ti. An order zat an pek chhuah thei chuan a lawm dawn hle tih a sawi nghal bawk. 

PM Modi pawhin Trump nena inbiakna an neih thu a twitter lamah a tarlang ve bawk a, US leh India chu Covid-19 hri beihna kawngah an thawh dun zel tur thu a sawi. 

US-ah hian nimin thleng khan hri kai hi mi nuai thum chuang an awm tawh a, mi 8,000 chuangin an thihpui tawh bawk a ni.