Spain-in ni 15 dang lockdown puan belh dawn

Spain prime minister Pedro Sanchez chuan Parliament-ah ni 15 chhung atan inkharkhip (lockdown) an ramin puan belh a la mamawh thu a thlen a, April 26 thleng lockdown hi puan belh tum a ni.

March 14 khan Spain chuan ni 15 awh turin emergency a puang a, ram pumah inkharkhipna kalpui nghal a ni. He emergency hi April 11 thleng kalpui tur a ni a, mahse hri kai leh thi an tam chhoh zel avangin Spain chuan inkharkhip a la mamawh a ni, tiin PM Sanchez chuan a sawi.

Spain-ah hian kar liam ta Inrinni thleng khan hri vanga thi hi mi 11,744 an awm tawh a, Italy ram tih lohah chuan he hri leng vanga thi tamna ber ram a ni ta. Zirtawpni liam ta khan Spain-ah hian mi 932 an thi a, a hma ni chiahin mi 950 an thi bawk tih health ministry chuan a tarlang.

United States tih lohah chuan Spain-ah hian hri kai hi an tam ber tawh a, nimin thleng kha chuan hri kai hi mi 126,168 an awm tawh a ni. Chung zinga mi 34,219-te chu enkawl dam tawh an ni bawk.