Italy-ah hri kai punna tlahniam ṭan

Italy ram chu Covid-19 vanga thi tamna ber ram niin, mi 15,000 dawnin an thihpui tawh. Mahse kar liam ta Zirtawpni aṭang khan hri kai punna hi a tlahniam ṭan tih National Health Institute (ISS) leh Higher Health Council (CSS) expert-te chuan an tarlang. 

Zirtawpni khan hri kai thar hi 2,339 an awm a, a hma niin hri kai thar hi mi 2,477 an awm. Hri kai enkawl dam pawh mi 1,480-ah pung chhoin, a hma ni aiin dam hi 49 in an tam bawk a ni. 

Civil Protection Department chief Angelo Borrelli chuan hri kai zinga 4,068 chu ICU-ah dah niin, mi dang 28,741 chu damdawi-in hrang hrangah enkawl mek an ni tih a sawi. Hetih lai hian hri kai zinga 62%, mi 52,579-te chu mahni inah an inkhung hrang mek a, an ngaihtuahawm lo tih a sawi bawk. 

Borrelli chuan an ram pumah mi 619,849 chu coronavirus test neih sak an ni tawh tih sawiin, ni hnih liam ta chhungin mi 80,000 test an ni, a ti. Hri darh tur venna atana inkharkhipna kalpui mek chu April 13 thleng hman a ni dawn tih sawiin, technical-scientific committee rawtna thehluh dan azirin he thupek hi pawhsei a ni mai thei tih a sawi bawk a ni.