Ethiopia Airlines thlawhtheihna tlaah damchhuak awm lo

Pathianni-a Ethiopia Airlines thlawh-theihna, Boeing 737 Max tlaa chuang mi 157 zingah damchhuak an awm lo.

Thlawhtheihna hi Ethiopia aṭanga Nairobi, Kenya pana thlawk a ni a, mahse Addis Ababa Bole International Airport aṭanga a thlawhchhuah aṭanga reilote-ah a tla a ni. Thlawhtheihna tlaa thi zingah hian Kenya mi 31, Canada mi 18, Ethiopia mi pakua, China, Italy leh US mi pariat ṭheuh, Britain leh France mi pasarih ve ve, Egypt mi paruk, leh Netherlands mi panga an tel niin airline chuan a sawi.

Ethiopia Airlines hian thlawhtheihna hi nikum November thla aṭanga a hman ṭan chuah a ni a, tha li chiah a la service hman a ni. Ethiopian Airlines Group CEO Tewolde Gebremariam chuan a chetsual chhan tak hi an la hriatchian theih loh thu sawiin, a la thar ṭha a, khawl lamah pawh harsatna a la tawk ngai lo niin a sawi.

Ethiopia Airlines thlawhtheihna a chetsual tuk, niminah khan Chinese airlines-te chu Boeing Co 737 Max thlawhtheihna hman chhunzawm tawh lo turin China sorkar chuan a hriattir.

Civil Aviation Administration of China (CAAC) chuan thuchhuah siamin, Chinese airlines-te chu Beoing Co 737 Max thlawhtheihna hi hmang tawh lo turin a hriatir a, Boeing leh US Federal Aviation Administration-te hnenah thlawhtheihna himna chungchang an sawipui pui hnuah thlawh tir chhunzawm an phal dawn chauh niin a sawi.