Kim Jong Nam thattua puh chhuah

North Korea ram hotu, Kim Jong-un-a unaupa, Kim Jong Nam thattua puh, Indonesia mi hmeichhia chu a prosecutor-in a laka thubuai siam a hnuhdawh hnuah chhuah zalen a ni.

Kum 27 mi Siti Aisyaah-i hi Kim Jong Nam thattua puhin tualthah thubuai siamsak a ni a, mahse nimin khan prosecutor chuan a thubuai hi a hnuhdawk a, a chhan erawh a sawilang lo. Judge-in a thubuai hnuhdawh a nih thu a puan hnuah Siti hi court aṭang hian Indonesia palai motor-in phurchhuah nghal a ni. Hetihlai hian tualthattua puh dang, Vietnam mi Doan Thi Huong-i erawh chu hren chhunzawm a la ni.

Siti leh Doan-te hi kum 2017, February 13 khan Kuala Lumpur airport-ah tur hlauhawm tak, VX chu Kim-a hmaia tahsak tua puh an ni. Hmeichhe pahnihte hi NKorea agent-te chuan Kim that tur hian an chhawr nia sawi a ni.

Hetihlai hian anni pahnih hian inbeihnaah an tel tih an hriat loh thu leh, reality TV show-a infiamna chi khat an tihtir nia an ngaih thu an sawi.

Kum hnih zet hren an nih hnuah Kim thahnaah hian Siti hi a inrawlh tih finfiahna engmah a awm loh vangin chhuah a ni ta niin a ukil, Gooi Soon Seng chuan a sawi. Hetihlai hian prosecutor chuan Siti thubuai hi hnuhdawh a ni a, thiam chantir a ni ta tihna a ni lo tih a sawi a, a ṭul chuan thubuai hi siamthar leh theih a ni tih a sawi.