Croatia president thar tur Zoran Milanovic

Croatia president thlanna Pathiannia neih zawh takah khan prime minister pawh lo ni tawh, Zoran Milanovic chu president atan thlan a ni.

State Electoral Commission chuan hemi chungchang hi tarlangin, Milanovic hian vote tlaa 52.67% a hmu a, a khingpui president nilai Kolinda Grabar-Kitarovic chuan vote tlaa 47.3% a hmu thung. Croatia President thar tur thlanna hi January 5 khan neih a ni a, mi maktaduai 3.8 velin vote an thlak a, hei hi an ram mipui 55% a tling niin Electoral Commission chuan an sawi.

Nikum December 5 kha Croatia President thlanna tura nomination thehluh hun tawp a ni a, candidate 11 an awm. December  22 khan inthlanna neih a ni a, mahse President ni thei tura vote hmuh ngai zat hmu pha an awm loh avangin kumin January 5 khan inthlanna an nei ṭha leh a, nikuma vote hmu sang pahnih president nilai Kitarovic leh Milanovic-te chu an inkhing leh a ni.

Milanovic hi kum 1991-a Croatia ramin independence an hmuh hnua president pangana a ni dawm. President nilai Kitarovic hian February 18 thleng pisa a kai ang a, Milanovic hian February 19 aṭanga kum 2025 February 18 thleng Croatia president nihna a chelh thung ang. Kum 53-a upa Milanovic hian kum 2011 December 23 aṭanga kum 2016 January 22 thleng khan Croatia prime minister hna a lo chelh tawh bawk a ni.