US Afghan base bul hnaiah Taliban dintu hun rei tak cheng

Taliban firfiak pawl dintu, Mullah Omar chu hun rei tak chhung Afghanistan-a US base bul hnaiah a lo khawsa reng niin Dutch journlaist, Bette Dam lehkhabu tihchhuah thar, 'Searching for an Enemy'-ah tarlan a ni.

US leh Afghanistan hruaitute chuan Taliban hruaitu hi Pakistan ramah a tlanchhiat hnuin a thi niin an ngai a, mahse lehkhabu tihchhuah tharah hian Omar hi Zabul province-a US base aṭanga mel thum vel chauha hlaah hun rei tak khawsain, kum 2013 khan a thi niin a tarlang.

Afghanistan sorkar chuan he lehkhabua inziak hi thu dik lo niin a sawi a, mahse Doha-a US sorkar nena inbiakna nei mek, Taliban pawl chuan thudik a nih thu a sawi thung.

Bettte Dam-i hian kum tam tak chhung Afghanistan chanchin a lo report tawh a, Afghan president hlui Hamid Karzai-a chanchin pawh a lo ziak tawh bawk a ni. Mullah Omar chanchin ziah nan hian kum nga hun a hmang a, Omar-a bodyguard Jabbar Omari pawh a kawm a ni. Omar hian Taliban sorkar paihthlak a nih hnuah Mullah Omar hi bikbo turin a hnuah pawh a venghim zui zel niin a insawi.

Kum 2001, September 11-a Taliban fifiakten US an beih hnu khan US sorkar chuan Omar lu manah hian US dollar maktaduai 10 a phal thu a tichhuak nghal a, mahse hetihlai hian Omar hi Qalat khuaah in lian vak loah a biru niin Dam-i chuan a sawi. He in neitu chhungkuate hnenah an mikhual chu tunge an ni tih pawh hriattir an nih loh thu leh, US sipaite pawn ṭum hnih an hmuhfuh ṭep thu a sawi bawk.

Kum 2004 khan US chuan Omar-a birukna hmun aṭanga hla vak loah Foward Operating Base Lagman an siam a, hei vang hian Omar pawh in dangah a insawn a, a birukna hmun aṭang hian a chhuak vak ngai vak lo niin Dam chuan a sawi. Kum 2013 khan a damlo a, mahse in enkawl tura Pakistan rama hruai a duh lo a, Zabul-ah a thi ta niin a sawi.