Khawvel pumah Covid-19 hri kai mtd 138 awm tawh

John Hopkins University data-a a landanin, khawvel puma Covid-19 hri kai hmuh chhuah tawh chu maktaduai 138.8 an tling tawh a, he hripui vanga thi maktaduai 2.98 an awm tawh bawk.

US chu khawvela Covid-19 hri kai tamna leh thihpui tamna ber ram a la ni chhunzawm zel a, hri kai hi 31,495,164 awm tawhin an zinga 565,283 in an thihpui tawh a ni. India chu hri kai hmuh chhuah tamna ber dawttu a ni bawk.

Brazil chu hri kai tam lamah India hnuaiah awm mah se, India ram aiin hripui vanga thi an tam zawk a, mi 365,444 in an thihpui tawh. Ningani khan Brazil-ah hripui vang hian mi 3,560 an thi a ni.

Africa khawmualpuiah pawh hri kai hi an pung chak hle bawk a, Africa Centers for Disease Control and Prevention (Africa CDC) chuan Africa ram zingah South Africa, Morocco, Tunisia, Ethiopia leh Egypt-te chu hri tam zualna an ni tih a sawi.

US leh India baka ram dang zinga coronavirus hri kai maktaduai hnih chuang hmuh chhuah tawhna chu Brazil (13,746,681), France (5,248,853), Russia (4,622,464), the UK (4,396,008), Turkey (4,086,957), Italy (3,826,156), Spain (3,396,685), Germany (3,095,016), Poland (2,642,242), Argentina (2,629,156), Colombia (2,602,719), Mexico (2,295,435) leh Iran (2,168,872) te an ni.

Hripui vanga thi mi 50,000 chuang awmna ramte chu US, Mexico, India, Italy, Russia, France, Germany, Spain, Colombia, Iran, Poland, Argentina, Peru leh South Africa te an ni bawk.