France-in an mi leh sate Pakistan chhuahsan turin hrilh

France sorkar chuan Pakistan rama an ram mi leh sa awmte chu ramchhung buaina thleng vangin Pakistan ram chhuahsan turin a hrilh.

France president Emmanuel Macron kaihhruai sorkarin France ram chanchinbu pakhatin Prophet Mohammad cartoon a tihchhuah chungchanga chanchinbu thlawpna lam a sawi avangin Pakistan-a Islamist-te chu France sorkar lakah an lungawi lo hle a ni. France sorkar lakah lungawi lohna lantir leh, France ambassor hnawtchhuak tura phutin Ningani khan kawng zawh an tum a, mahse sorkar chuan kawngzawh an tum hi a khapsak.

Tehreek-e-Labbaik Pakistan (TLP) hotu Saad Rizvi chuan Islamite-te chu an ram chhung khawpui hrang hrangah France duh lohna lantira kawng zawh turin a fuih a, Thawhlehni khan lungawi lohna kawngzawh hi an lo huaihawt tawh a, police-te nen innawr buaiin buaina chhuakah hian police pahnih an thi a ni. Saad Rizvi hi police-ten an man tawh a ni.

Ningani khan France embassy chuan thuchhuah siamin, Pakistan-a France mi leh company awmte chu an himna tur ngaihtuaha he ram hi chhuahsan turin an chah. France embassy-ah pawh venhim hna thawk turin security force dah belh an ni bawk. Sorkar chuan Pakistan rama an mi leh sa awm in register chu nikum khan 445 niin, company 30 chuang a awm bawk niin a tarlang.