Coronavirus : China-in ni 10 chhungin hospital 2 sa thar Hri leng vanga thi 362 tling tawh

China rama hri leng mek, novel coronavirus kai an pun belh zel avangin a enkawlna tur damdawi-in pahnih hmanhmawh takin sak a ni. Nimin khan damdawi-in pakhat zawk chu hman ṭan a ni a, a dang pakhat pawh vawiinah hawn a ni ang. 

Nimin thleng khan he hri leng vanga thi hi China ramah mi 361 an awm tawh a, mi 17,000 chuangin an kai tih finfiah a ni tawh bawk. China bakah Philippines ramah mi pakhatin he hri hi a thihpui tawh bawk. 

Novel coronavirus veite enkawlna tura Wuhan khuaa khum 1,000 awmna, Huoshenshan hospital chu ni 10 chhungin sak zawh niin, nimin aṭang khan hman theiha hawn a ni. He hospital hi square meter 25,000 a zau a ni a, thawktu 1,400 an awm. Nimin khan coro­navirus kai, damlote chu enkawl turin he damdawi-inah hian admit ṭan nghal an ni. 

Huoshenshan Hospital sak hna hi mi 7,000 ten thawkin, chhawng hniha sang a ni. Hospital-ah hian specialised ventilation system-te dah a ni a, hospital staff-te'n damlo awmna room-a lut kher loa an mamawh an pek theihna turin damlo awmna room leh hallway inpawhna tur, double-sided cabinet siam vek a ni. Hei bakah hian damdawi leh test sample-te semkual turin Chinese company pakhat aṭangin 'medical robot' pek an ni bawk. 

China thuneitute chuan Huoshenshan Hospital aṭanga mel 25-a hlaah emergency hospital pahnihna, Leishenshan Hospital an sa bawk. He hospital hi square meter 30,000 a zau turin a ni a, khum 1,500 a awm dawn bawk. Vawiin hian hman ṭan theih beisei a ni. 

Thuneitute chuan Huanggang leh Zhenzhou khuaah pawh hospital sak belh a ni dawn tih an sawi. 

Kum 2003-a SARS a len khan, China sorkar chuan ni sarih chhungin Beijing-a hri kaite enkawlna tur Xiaotangshan Hospital a sa zo hman tawh bawk. He hospital-ah hian SARS vei hmun sariha ṭhena hmun khat chu an enkawl hman a ni. 

China foreign ministry thu­puangtu, Hua Chunying chuan nimina press meet a neih­naah, an ramin medical mask, protective suit leh safety goggles-te hman­hmawh taka a mamawh belh thu a sawi. 

China rama factory-te chuan ni khatah mask hi maktaduai 20 vel an siam thei a, mahse hei hian mipuite mamawh a phuhru zo lo a ni. Hei vang hian thuneitute chuan Europe, Japan leh US aṭangin medical mask lakluh dan an ngaihtuah mek a ni. 

Foreign ministry chuan South Korea, Japan, Kazakhstan leh Hungary-in damdawi lam hmanrua mamawhte an pe tih a sawi bawk. 

Thuneitute chuan province leh khawpui ṭhenkhatah pawn an chhuahin mask vuah ngei ngei tura mipuite a hriattir avangin mask mamawhna hi a sang hle a ni. He hriattirna an pek zingah hian Hubei province bakah Guangdong, Sichuan, Jiangxi leh Liaoning te a tel a, heng province-a cheng hi mi maktaduai 300 an chuang a ni.

 

Novel coronavirus hri leng darh zel tur venna atan mainland China nena an inrina khar vek phutin Hong Kong hospital staff ten nawrh an huaihawt. 

Hong Kong sorkar chuan hri len hnu hian mainland China nena an inkara rel leh lawng service chu a titawp tawh a, mahse health worker-te hian hei hi an duh tawk lo a, ramri khar vek an duh. Thuneitute chuan ramri khar vek chu World Health Organization (WHO) duhdan kalh a ni tih an sawi thung. 

Hong Kong-ah hian novel coronavirus vei mi 15 hmuh­chhuah an ni tawh a ni. Novel coronavirus hi China bakah ramdang 25 velah a darh tawh nia sawi a ni.