Covid-19 vangin Asia mite huatna thu hluar

Covid-19 lengin khawvel ram tam zawk a tibuai mek a, hetih lai hian he hri hi China rama hmuhchhuah hmasak ber leh, he ram aṭanga darh a nih avangin China leh Asia mite huatna a hluar chho a, internet lamah diriamna ṭawngkam hmuh tur a tam hle. 

Australia, India leh United Kingdom kawtthlerahte Asia mite thliarhranna lam hawi thil thleng report a tam hle. US-ah ngei pawh Asia mite duh lohna leh diriamna thleng a awm fo bawk. 

Facebook, Twitter leh TikTok chuan chi inthliarna leh indiriamna lam thu ziak awm ṭhinte dang turin an bei zel tih sawi mah se, social media lamah Asia mite beihna hi a thleng reng a ni. Facebook company thupuangtu chuan chi inthliarna, indiriamnate hi Facebook leh Instragram chuan a thlawp ngai lo tih sawiin, hetiang comment leh post an hmuh chuan an paih nghal zel tih an sawi. Dan bawhchhiate chunga action an lak theihna turin, inthliarna lam hawi thu ziakte an hmuh chuan report zel turin mipuite an sawm. 

Twitter pawhin an dan siamte bawhchhe zawnga tweet awmte chu an paih nghal zel tih a sawi a, an paih tawh zinga a zahve zet chu report a luh hmaa an hmuha an paih nghalte an ni tih an tarlang.