Singapore-in migrant worker 20,000 khung hrang

Singapore sorkar chuan ram dang aṭanga an rama hnathawka lut, mi 20,000-te chu dormitory pahnihah ni 14 chhung atan inkhung hrang turin a ti.

Hri kai an pun zel avangin vawiin aṭangin Singapore pawh hian thla khat chhung inkharkhipna a kalpui dawn a ni. 

Singapore-ah hian mi maktaduai 5.7 vel an cheng a, an zingah hian ram dang mi, inhlawhfaa awm mi maktaduai 1.4 vel an tel a ni. 

Inkhung hrang tura tihte hi construction worker-te an ni a, dormitory pakhatah hian mi 13,000 awmin an zingah hian hri kai 63 an awm.

Domitory pakhat dangah mi 6,800 awmin hri kai 28 an awm bawk. An awmna hmunah hian ni khatah ei tur vawi thum pek an ni dawn a, mask leh hand sanitiser pek an nih bakah ni khatah an khawsik leh khawsik loh ṭum hnih endik ziah an ni ang. An hlawh pawh pek an ni bawk ang. Mahse hnathawktute hian an awmna hi a tawtin a bal hle tih an sawi a, room khatah mi 12-te an awm nia sawi a ni.