New Zealand-a moque-a beihnaah mi 49 thi

New Zealand-a Christchurh khuaa mosque pahnih chu nimin khan beih a ni a, mi 49 thiin mi dang tam takin hliam an tuar. Mosque beitu nia hriat, Australia mi Brenton Tarrant chu man nghal a ni.

Central Christchurh-a Al Noor Moque-ah Zirtawpni ṭawngṭaina hun hmang tura inkhawmte chu silai keng pakhatin mosque hnung lam aṭanga lutin inchhunga awmte chu a pawng kah a ni. Pawikhawihtu hian mipa ṭawngṭaina room-a awmte chu bei hmasain, a hnuah hmeichhe ṭawngṭaina room amite a kap zui leh nghal bawk.

Hemi hnu hian khawdai, Linswood-a mosque chu beih a ni leh bawk. Police-te chuan motor ṭhenkhata IED tihpuah tura dah eng emaw zat manin, bomb-te hi an sut nghal niin an sawi. Pawikhawihna a thlen hnu hian thuneitute chuan Christchurh khuaa mosque-te chu khar vek turin an hriattir nghal a, venhim hna pawh tihkhauh nghal a ni bawk.

New Zealand police-ten Al Noor mosque beitu nia rinhlelh, Australia citizenship nei an man chu tualthah thubuai siamsakin vawiin hian court-ah hruai nghal a ni dawn tih an sawi. Ani bakah hian pawikhawihnaa inhnamhnawiha rinhlelh midang pathum man tel an ni bawk a, an zingah hian hmeichhe pakhat a tel.

Australia Prime Minister Scoot Morrison pawhin mosque beitu nia puha man Brenton Tarrant hi Australia mi, right-wing extremist a nih thu a sawi.

New Zealand media-te chuan mosque beitu hian a hmain pawi a khawih tum thu hi a lo sawilang tawh niin an sawi a, hei bakah hian mosque-a mi a kap lai chu a lu-ah camera vuahin Facebook-ah a live bawk. Facebook chuan silai hmetpuaktu Facebook leh instragram account hi an tihtawp sak nghal tih sawiin, mi a kap lai footage chu hmun dang ami pawh paihbo tumin an buaipui mek tih an sawi. Police-te pawhin he footage hi online lamah share lo turin mipuite an ngen bawk.

Police Commissoner chuan an mi man hi a hmain New Zealand leh Australia security service-te chuan pawikhawihna lam hawia a inhnamhnawihna an la hriat loh thu an sawi tih an tarlang.

New Zealand Prime Minister Facinda Ardern-i chuan news conference nei nghalin, pawikhawihna thleng chu firfiak thiltih a ni tih sawiin a dem thu a sawi. New Zealand tana ni lungchhiatthlak tak a nih thu a sawi.