UK Parliament-in Brexit tihkhawtlai duh

Britain Parliament chuan European Union (EU) aṭanga UK inlakchhuah hun tur chu thla thuma tihkhawtlai rawtna an pawm.

Parliament hian Britain Prime Minister Theresa May-in EU hruaitute nena an inlakchhuahna tura inremna an siam, Withdrawal Agreement chu ṭum hnih a hnawlsak a, hemi hnu hian inremna siam loa inlakchhuah chungchangah vote lak leh niin, inremna tel loa inlakchhuah erawh an duh lo thung. Hei vang hian Ningani khan sorkarin March 29-a EU aṭanga chhuah hun tura ruahman tihkhawtlai a rawtna chu an pawm ta a ni.

EU chhuahsan hun tihkhawtlai rawtna hi House of Commons-a MP zinga 412-ten thlawpin, a thlawp lo lamah vote 202 a tla bawk. Sorkarin motion a putluhah hian EU aṭanga an inlakchhuah tur dan pawimawhte pass a nih theihna turin June 30 thleng pawhsei a rawt a ni.

March 20 hian PM May-i chuan Brexit deal a siam chu Parliament hian a ngaihtuah leh dawn a, he hunah hian pawm a nih loh chuan EU chhuahsan hun tur hi thla thumin pawhsei a ni thei dawn a ni.