Covid-19 vangin mi maktaduai 3 chuang thi tawh
Khawvela hripui leng mek, Covid-19 vangin mi maktaduai thum chuang an thi tawh a, hri kai hmuh chhuah hi maktaduai 140 chuang an tling tawh bawk.
John Hopkins University in a tarlan danin, Inrinni liam ta thlenga hripui vanga thi hi Ukraine-a Kyiv, Venezuela-a Caracas leh Portugal-a Lisbon khawpuia cheng zat an ni tawh tih sawiin, Chicago khawpuia cheng zat aiin an tam tawh zawk bawk a ni.
Hripui vanga thi zat hi sorkar ṭhenkhatin a dik tak an tarlan loh avangin, thi zat hi record ai hian an tam zawk hle rin a ni bawk. Hripui hi ram hrang hranga a darh hnuah Covid-19 hri chi dang hmuh chhuah belh zel a ni bawk.
US chu hri kai leh thihpui tamna ber ram a ni chhunzawm zel a, US-a hri kai hmuh chhuah hi nimin zing thleng khan mi 3,16,27,701 tling tawhin, an zinga 5,66,893, in an thihpui tawh a ni.
Hri kai tamna ber dawttu chu India a ni a, mahse India aiin Brazil ramah hripui vanga thi hi an tam zawk. Covid-19 hri vanga mi 50,000 chuang thih tawhna ramte chu US, Brazil, Mexico, India, UK, Italy, Russia, France, Germany, Spain, Colombia, Iran, Poland, Argentina, Peru leh South Africa-te an ni.
Kumin January thla aṭang khan Europe leh US-ahte vaccine pek chhuah runpui neih chhoh ṭan a ni bawk. Tunah hian ram 190 chuangah Covid-19 vaccine hi pek chhuah mek a ni. Hetih lai hian ram 60 vel chuan June thla hma chuan vaccine hi an la dawng ve thei dawn lo.
Vaccine pek chhuah tawh, dose maktaduai 700 zinga 87% chu ram hausa zawkten an chang. Ram hausaah vaccine hi mi paliah mi pakhat zelin vaccine hi an dawn tawh laiin, ram rethei zawkah chuan mi 500 chuang zinga pakhatin an la dawng ve chauh thung.