ASEAN summit-ah Myanmar sipai hotu a tel dawn

Indonesia rama Asso­ciation of Southeast Asian Nations (ASEAN) summit, tunkar Inrinnia neih turah Myanmar sipai sorkara a hotu lu ber, senior general Min Aung Hliang a tel dawn tih Thailadn chuan a puang. Hei hi February 1-a civil sorkar thuneihna an hnehchhuh hnuah ram pawn lama a zinchhuahna hmasa ber tur a ni.

Thailand foreign mi­nistry thupuangtu Tanee Sangrat chuan April 24-a Jarkarta-a meeting neihtura ASEAN ram 10 zinga hruaitu ṭhenkhatte an tel tur thu hi a tichiang tih sawiin, an zingah hian Min Aung Hliang pawh a tel a ni, a ti.

Myanmar sipai sorkar hian Inrinni khan an ram kum thar lawmna pualin jail-a tang mi 23,184-te chu ngaidamin a chhuah tir tih Prisons Department chuan a sawi. Tang chhuah zinga a tam ber hi February 1 hma lama mante an ni tih department thupuangtu Kyaw Tun Oo chuan a sawi a, an zingah hian ram dang mi 137 an tel bawk.

Hetih lai hian sipai sorkar chuan civil sorkar hnena thuneihna pek let phuta an rama nawrh huaihawtnaa inhnamhnawih, mi 832-te chu man tumin a la zawng chhunzawm zel. Heng zinga 200 chuang chu mi lar, actor, singer leh internet celebrity-te an ni.

State media chuan Inrinni khan mi 40 manna thupek a tichhuak leh bawk a, an zinga 20 chu doctor an ni.