New Zealand PM-in gun law khauh zawk siam a tiam PM office-in pawikhawihtu hnen aṭangin manifesto dawng

New Zealand-a Christchurch khuaa moque pahnih beih a nih hnuah New Zealand Prime Minister Jacinda Ardern-i chuan gun law an hmang mek chu thlak a, dan khauh zawk siam a nih tur thu sawiin vawiinah hian cabinet chuan a ngaihtuah dawn a ni, a ti. PM chuan semi-automatic weapon khap chungchang pawh ngaihtuah a ni dawn tih a sawi bawk.

PM Adern-i chuan pawikhawihtu hian mosque-a ṭawngṭaina a beihna atan hian silai panga a hmang niin a sawi a, heng zingah hian semi-automatic weapon pahnih leh shotgun pahnih a tel.

Adern-i chuan mosque beih a nih hma lawk minute 9-ah a office chuan pawikhawihtu-in a manifesto a thawn chu an dawng tih a sawi a, he manifesto hi mi 30 chuang hnenah a thawn tih a sawi. Mahse hetah hian a beih tum hmun leh chanchin kimchang a tarlang tel lo a, he thu a dawn aṭanga minute hnih chhungin security service-te a hriattir nghal tih a sawi.

Kar kalta Zirtawpni khan kum 28 mi, Australian citizen Brenton Harrison Tarrant chuan Christchurch khuaa mosque pahnih hi beiin, ṭawngṭaina hun hmanga kalte chu a pawng kah a, mi 49 kaphlumin midang eng emaw zat a kap hliam bawk. Nimin khan hliam tuar zinga pakhat chu a thi leh a, thi hi 50 an tling ta a ni.

Mosque a beih hnu minute 36 chhungin New Zealand police-ten Tarrant hi an man hman a, ani bakah rinhlelh thilah midang pathum man tel an ni bawk a, an zinga pahnih chu an la hren chhunzawm a ni.

Inrinni khan Tarrant hi Christ-church District Court-ah hruai nghal niin, tualthah thubuai siamsak a ni a, thubuai dang pawh siambelh sak leh a la ni dawn niin police-te chuan an sawi. April 5-ah High Court-a a inlan leh ang.

March 14-a pawikhawihna rapthlak tak thlen hnu hian New Zealand-a mosque-te chu venthawn thilah khar vek tura tih an ni a, mahse nimin khan mosque ṭhenkhat chu hawn an ni leh tawh a ni. New Zealand Police-te chuan mosque-te chu hawn an duh chuan an inhawng thei tawh tih sawiin, police-ten venhimna ṭha tak an pek tur thu an sawi.