Christchurch mosque beituin a lawyer a ban : New Zealand-in ni 10 chhungin gun law siam ṭha dawn

New Zealand-a Christchurch khuaa mosque beia mi 50 thattu Brenton Tarrant chuan a lawyer atana pek, Richard Peters a ban a, court-ah hian lawyer nei loin ama tan a ding nghal dawn a ni.

Richard Peters chuan Tarrant-an a ban thu hi locial media-te hnenah pawh a sawichiang tawh a, Tarrant chu rilru lamah harsatna nei a ni lo tih sawiin, a aiawha midang dintir a duh lo niin a sawi.

Kum 28 mi, Australia mi Tarrant hian kar kalta Zirtawpni khan mosque-a ṭawngṭaite chu moque hnung lam aṭanga luhkhungin a pawng kah a, a pawikhawih lai hi Facebook-ah a live zui bawk a ni. Mahse pawi a khawih hnu lawkah New Zealand police-ten manin, Inrinni khan court-ah hruai a ni a, tualthah thubuai siamsak nghal niin thubuai dang pawh siamsak belh leh a la ni dawn nia sawi a ni.

Tarrant chuan moque a beih chhan chu an ram beitu leh runtute laka an ram humhimna tura ti a nih thu a sawi. Tarrant hi Dunedin-a cheng niin, mosque a beih hma hian pawikhawihna lam record engmah a la nei lo a, mahse mosque a beih tur erawh hi chu a hma aṭangin ruahmanna a lo siam lawk vek nia sawi a ni.

Christchurch khuaa pawi-khawihna rapthlak tak a thlen hnuah New Zealand Prime Minister Jacinda Ardenn-i chuan gun law khauh zawk siam a nih tur thu a sawi nghal. Nimin khan PM kaihhruai hian cabinet meeting an nei nghal a, ni 10 chhungin gun law siamṭhat an remti.

Cabinet meeting-ah hian ṭangrual sorkara tel party pathum, New Zealand Labour party, New Zealand First party leh Green Praty-te chuan gun law siamṭhat hi an remti vek a ni. Mahse dan siamṭhat a nih dan tur erawh an la puangzar lo.

Mosque beihnaa thi mi 50-te sunna inkhawm hi ram pumah buatsaih tum a ni bawk.

Australia police-te chuan nimin khan an rama Tarrant-a chhungte in pahnih an dap. Police-ten in an dap pakhat hi Tarrant-a nu, Sharon Tarrant in a ni. Police-te chuan New Zealand police-te pawikhawihna thleng an chhuinaa an puih theihna tur thil a awm leh awm loh an zawng tih an sawi.

Tarrant-a chhungte hian Nine News-a interview an neihah pawi an tih thu sawiin a thiltih avang hian ngaihdam an dil. A pu, Terry Fitzgeralh chuan mosque beihnaa thi chhungte leh hliam tuarte lakah ngaihdam an dil tih sawiin, pawi an ti tak zet tih a sawi. A pi Marie Fitzgeral pawhin an chhungkaw miin hetiang pawikhawihna rapthlak tak a thlen thei ang tih chu hriatthiam harsa a tih thu thu a sawi a, a tupa chu a rilru a buai zo ta nia a ngaih thu a sawi.

Brenton Tarrant hi Sydney aṭanga km 50 vela hla, Grafton-ah cheng ṭhinin, Big River Gym-a personal trainer a ni ṭhin. Kum thum vel liamta khan New Zealand-ah hian pemin Dunedin khuaah a cheng a ni.