New Zealand PM-in pawikhawihtu hming sawilang duh lo

New Zealand Prime Minister Jacinda Adern-i chuan kar kalta Zirtawpni-a Christchurch khuaa mosque beitu chu a hming a sawilang ngai dawn lo tih a sawi.

Nimina Parliament-a thu a sawiah PM chuan, "Pawikhawihtute hian a thiltih aṭang hian thil tam tak hmuh phah a tum a, chung zingah chuan a chhe zawng pawh ni se hmingthan a duh a ni. Hei vang hian a hming hi ka lamri ngai lo ang" tiin a sawi.

Mosque pahnih a beihnaa mi 50 kaphlumtu leh mi dang tam tak hliamtu, kum 28 mi Brenton Tarrant chuan mingo dahchungnung duhtu a ni tih a insawi a ni. Tarrant hi tualthah thubuai siamsak a ni a, mahse sorkarin a lawyer atan a pek chu a ban a, court-ah a aiawhtu awm loin a ding dawn a ni.

PM Adern-i chuan midangte pawh pawikhawihna thleng chungchang an sawi a nih pawhin a pawikhawitu hming ni loin, nunna chan tate hming chu sawilang zawk turin a ngen. "Firfiak a ni a, misual a ni. Mahse a chungchang ka sawi apiang hming neilo angin a awm ang" tiin a sawi.

Brenton Tarrant hian mosque-a ṭawngṭaite lungkhunga a kap lai hi a Facebook-ah a live a, mahse he thil hi hriatchhuah a nih hnuah Facebook chuan a account hi a tihtawp sak nghal a ni. Social media lian pathum Facebook, Twitter leh Google-te chuan video footage hi paihbo tumin an bei nghal a, mahse an paih hma hian internet lamah a copy a darh nasa hman hle.

Facebook chuan Brenton-an live-a a pawikhawih lai a pekchhuah, minute 17-a rei hi entu mi 200 an tling lo niin a sawi a, a video hi an paihsak hma hian view 4,000 vel a awm hman tih a sawi. Live-a a pek lai entu zingah hian report an awm lo niin a sawi a, video report an dawn hmasa ber chu live broadcast a tawp aṭanga minute 12 hnu daih niin a tarlang. Pawikhawina a thlen aṭanga darkar 24 chhung khan he video copy maktaduai 1.5 chuang an paih hman a, video upload tum maktaduai 1.2 chu an block hman bawk.