Myanmar court-in kum 20 tang turin Rakhine hruaitu hrem

Myanmar court chuan nimin khan Rakhine state-a Arakan National Party chairman hlui, Aye Maung chu ram phatsana puhna leh inhuatna chawktho thei zawng thu sawia puhnaah thiam loh chantirin, kum 20 tang turina hrem.

State khawpui, Sittwe-a Aye Maung chungthu ngaihtuah a nih lai hian court pawn lamah amah thlawptu mi tam tak an pungkhawm a, buaina chhuak tur vengin sipai ṭhahnem tak duty tir an ni bawk.

Nikum January thlaa thu a sawiah, Aye Maung hian sorkar laipui chu na taka sawiselin, Rakhine state mite chu sal ang maia an en thu leh, an state mipuite pawhin an dikna chanvo humhalhna tura an thawhchhuah a hun tawh tih thute a sawi a ni. He thu a sawi tlaiah hian Rakhine state-a mi eng maw zat chuan sorkar building leh police-te an bei zui nghal a, mi pasarih an thi a ni. Buaina a chhuah zui tak avang hian Auye Maung leh rally neihnaa thusawitu dang, writer Wai Hin Aung-te chu man an ni.

Tun hnaiah Rakhine state-ah hian helpawl Arakan Army (AA) leh Myanmar sipaite an inkap a, mi tam tak chu himna zawngin an tlanchhia a ni. AA hian January thla tir lam khan police post beiin officer 13 an kaphlum a, tun thla tir lamah police pakua an that leh bawk.