Cyclone Idai tleh vanga thi pung zel

Mozambique rama thlipui, cyclone Idai tleh leh tuilian vanga thi chu an punbelh zel a, President Filipe Nyusi chuan chhiatna thleng vanga thi hi mi 1,000 an tling thei dawn niin a sawi.

Cyclone Idai hian Mozambique ram bakah Zimbabwe leh Malawi ramah chhiatna nasa tak a thleng a, thlipui tleh hian ruah a ken tel avangin hmun tam takah tui a lian a, kawngpui leh inbiakpawhna hmanruate pawh a chhe nasa hle.

President Filipe Nyusi chuan chhiatna thlenna bial hi Thawhṭanni khan a tlawh a, hmun hrang hranga chhiatna thlen dan aṭang chuan mitthi zat hi 1,000 chuang an tlin chhoh a rinawm tih a sawi. Tuilian hian thingtlang khaw eng emaw zat a chim a ni.

Mozambique ram bikah hian thlipui tleh leh tuilian vanga thi hi mi 98 an tling tawh a, chin hriat loin mi 200 chuang an awm mek. Malawi ramah pawh mi 56 in nunna an chan tawh bawk.

Mozambique khawpui lian pali-na, Beira chu tuilianin a chim nasa hle a, chhanchhuah hna thawk mek a ni. Chimanimani district chu tuilian hian kawngpui a tihchhiat avangin kalpawh theih lohin an awm mek bawk.

Zimbabwe treasury chuan an rama thlipui tleh leh tuilianin kawng leh lei a tihchhiat siamṭhatna turin US dollar maktaduai 18 a pechhuak a, tuilian tuarte tui thianghlim in tur leh electricity pek an nih theih nan thawh mek a ni bawk. Zimbabwe sorkar chuan thlipui tlehin chhiatna a thlenna bialah hian state of disaster a puang tawh bawk a ni.