Myanmar 'national unity government'-in ASEAN summit-a tel ve an phut

Myanmar sipaiten civil sorkar thuneihna an hnehchhuh hnua Parliament elected member ban takten an din, national unity goverment (NUG) chuan ASEAN summit neih turah an aiawh tel tir ve an phut.

Myanmar sipai hotu lu ber, senior general Min Aung Hlaing chuan Jakarta, Indonesia-a ASEAN summit-a a tel tur thu hi a lo tichiang tawh a ni. Hei hi sipaiten civil sorkar an paithlak hnuah ram pawn lama a zinchhuahna hmasa ber tur a ni.

National unity government-a deputy minister of foreign affairs, Moe Zaw Oo chuan ASEAN chuan Myanmar buaina tawh mek chu chinfel a duh takzet a nih chuan, NUG aiawhte nena inbiakna an neihpui loh chuan awmzia a awm dawn lo tih a sawi. NUG chu Myan­mar mipuite an thlawp a, dan ang taka din a nih thu sawiin, sipai sorkar chu pawm lo tura a duh thu Moe Zaw Oo chuan a sawi.

Myanmar ram chhunga khawpui hrang hrangah sipai sorkar duh lohna lantirin nawrh huaihawt chhunzawm zel a ni a, Pathianni khan Mandaly, Meiktila, Magway leh Myingyan-ahte nawrh huaihawt a ni a, mipui kalkhawmte chuan NUG an thlawpna thuziakte an keng bawk.

Myanmar sipaiten Japan journalist an man
Japan sorkar chuan Pathianni zan khan Myanmar thuneituten Japanese journalist, Yuk Kitazumi chu Yangon-ah an man tih nimin khan a sawi.

Freelance journalist, Kitazumi hi Yangon-a a chenna inah Pathianni zan khan sipaite kalin an man a, motor-in an phur chhuak nghal tih BBC Burmese chuan a tarlang. Japan chief cabinet secretary Katsunobu Kotu chuan nimin khan news conference neiin, Myanmar hnenah pawh journalist hi chhuah nghal tura an ngen thu leh, Myanmar rama Japan mi awmte himna tur pawh an ngaihtuah mek thu a sawi.

Kitazumi hian media produc­tion company, Yangon Media Pro­fessionals a siam a, Nikkei business daily-ah pawh a lo thawk tawh ṭhin. Sipai rorelna duh loa nawrh huaihawtte chungchang a ziah avangin February thla khan man a ni tawh a, mahse reilote hnuah chhuah leh nghal a ni.

Sipaiten an mi mante thlalak tichhuak
Myanmar sipai thunun, MRTV chuan Pathianni khan sipai rorelna duh lohna lantira nawrh huaihawt an man zinga mi parukte thlalak a tichhuak. TV-a thlalak an tihchhuah hi mipa pali leh hmeichhia pahnih an ni a, taksaah nghaisakna hnuhma te a awm nia sawi a ni. Hmeichhe pakhat zawk chu a khabe a vung a, a mit pawh a duk bawk.

Monitoring group, Assistance Association for Political Prisoners (AAPP) chuan heng thlalak tih­chhuah hnu­ah, mi tang tam tak awm mekte dinhmun a ngaih­tuahawm hle nia sawiin ram hrang hrangte hnenah hma la thuai turin a ngen. AAPP chuan ram dangten hma an lak loh chuan, mi tang ngaihsak leh sawisak hlumte chu a la thleng zel dawn a ni, a ti.

AAPP-in a tarlan danin, February 1-a sipaiten sorkar thuneihna an hneh­chhuh duh lohna lantira nawrh huaihawt zinga mi 737-te chu sipai kut tuarin an thi tawh a, mi 3,229 man an ni tawh bawk a ni.